24 يناير 2012

نصيحة بعين مندس للشباب اللى هينزل المظاهرات بكرة

هتنزل المظاهرة وكلك أمل الناس تتفاعل معاك … دا صحيح
طيب لازم تفهم ان لسه فى ناس مش فاهمين فى ايه … فى ناس اصلا متعرفش ميدان التحرير حتى الان
لازم اللى هيتناقش معاك يفهم فلا تكن منفر ولو فى ناس بتتناقش لا تتدخل فى المناقشة حتى لا تربك متلقى المعلومة … كمان مهم قوى تراعى موضوع السن … يعنى الافضل اللى يتناقش مع راجل كبير راجل كبير زايه والست الكبيرة اقدر واحدة تفهمها ست كبيرة زيها
كمان مهم قوى تخلى البنت تناقش ولد لانه هيتلقى افضل من انثى عن ذكر … وكذلك العكس ... لازم تعرف تقرأ عقل اللى قدامك بسرعة لتعرف الطريقة المثلى للحوار معه ... احيانا صمتك سيكون افضل من تنفير شخص منك ومن الثورة!

!الشعب بتاعك مبيرعفش يقرأ ولا يكتب
أعلم جيدا ان عدد كبير من الشعب مبيعرفش يقرأ … وخصوصا جنود الامن المركزى والجيش … دا معناه ان اللى هيحمل يافطة لازم  تكون معبرة مش بس كلام … ولو مضطر للكتابة يبقى اليفط تكون جملة واحدة بخط واضح وفى الصميم كانك بتكتب على تويتر ب ٣٥ حرف على الأكثر
مثال لليفط المعبرة … صورة لجندى بيحمى بنت على اليمين وجدنى اخر بيسحل شاب وتحط علامة صح على اليمين وغلط على الشمال ... ومثال على يافطة مكتوبة معبرة "انا مش حاسس بالتغيير ونازل تانى التحرير"
ممكن كمان صورة لسيدة عليها علم مصر وجندى بيبوس ايدها والناحية التانية نفس السيدة دايسة على دماغ جنرال جيش 
صدقونى مهم جدا جدا جدا انك تاخد بالك ان اللى قدامك مبيعرفش يقرأ لازم تكون صورك معبرة جدا … متتعبش نفسك بحمل لافتة كلها كلام لان مش هيستفيد بيها غير الاعلام فقط!

الهتافات
الهتافات لازم تحسس المواطن ان مش كل الناس ضدك وانك مش ضد كل شىء … فى رأيى لازم نبتعد عن "الجيش والشرطة ايد وسخة" ونستبدلها بهتاف "العسكرى دا غلبان والظابط تعلب جعان" او  "العساكر دولا غلابة وطنطاوى ملك الغابة" او "العسكرى مظلوم فى الجيش ياكل عدس ويلبس خيش"
صدقونى بكده تقدر تتجنب غسيل المخ اللى بيعملوا الجيش فى العساكر
لازم فى هتافك ترسخ للفجوة اللى بين لواءات الجيش وعساكره … لازم تفصل الجيش عن قياداته
تجنب الشتائم والسباب … صدقونى بيجيب نتيجة عكسية
وعلى فكرة هتاف "الجيش والشرطة والشعب ايد واحدة" هتاف مهم ... اكيد هيزعلك بس هيشيل الفجوة اللى  شايفها المواطن بينك وبين مظاهرات العباسية ... لانك بكده من دعاة الفوضى وهم من دعاة الاستقرار  ... وفى الأصل انت من دعاة الاستقرار الابدى ليس هم ... فلازم المواطن يحس ان اللى يفرق بينك وبين المظاهرات المؤيدة انهم مؤيدين لطنطاوى وحكمه فقط "لا تكرس الفجوة بينك وبين المواطن العادى"

الهتاف الواحد يا شباب صدقونى الهتاف الواحد له مفعول السحر ... متتخيلوش وانا فى وسط الجنود وهما بيسمعوا هتافكوا بيحصلهم ايه ... بيرعب من هو ضدك وبيصنع رهبة منك عالية جدا ... وفى نفس الوقت المواطن العادى بيحس اننا ايد واحدة وليس لدينا اطماع شخصية فى شىء

الصورة الحضارية 
مهم جدا علم مصر وابتسامة عريضة ولبس يليق بالمظاهرة … كل دى مفاتيح للدخول فى قلب المواطن!
بلاش الكعب العالى يا بنات … بلاش المكياج انتى مش طالعة رحلة … بلاش يا ولاد الشعر الطويل المربوط بفيونكة … بلاش الكلام فى الدين وانت تعلم القليل عنه عشان محدش يزنقك
انك توسع الطريق للعربيات بكل لطف الناس هتحترمك … ان اللى يشتمك من شباك عربيته قوله الله يسامحك بكره تعرفه اننا صح "اتمسكن" … تجنب انك تغطى وشك كانك محكوم عليك او خايف من حاجة - زمن الخوف راح - وتجنب الماسكات الغير مفهومة للمواطن العادى ما بالك بالذى لا يجيد القراءة والكتابة "ممكن تلبس ماسك فانديتا فى ظهر وجهك بالعكس" … مهم جدا ان ميبقاش فى وسطيكم حد مش باين وشه لانهم هيندسوا بنفس الشكل ودا اخطر شىء انك متبقاش عارف دا مين؟؟ … لان لو حصل حاجة وهما متصورين بوشوشهم نقدر نعرف حصل ايه وفين بعد مراجعة التصوير … اللى بيلبسوا شبابشب وفقراء الحال حطوهم فى منتصف المظاهرة مش براها "انا مش بروج لمبدأ الطبقية لكن هو دا شعبك على ماتفرج" لازم اللى يبقوا على اطراف المسيرة شباب شكلها جميل شيك بيعرفوا يتكلموا

لا تتخاذل
هتقابلك ناس تهدف الى الفوضى والسرقة فى وسط المتظاهرين ... ناس تانية تتطلع للعنف الغير مبرر ... ناس تالتة تنفر ولا تبشر ... خد موقف وانصحه بهدوء وقل له هذه الصورة نجحت لانها سلمية والدم بيجيب دم ... نحن هنا للدفاع وليس للهجوم
لو لقيت الناس مش بتهتف هتاف واحد لازم بكل طاقتك  تساعدهم يهتفوا نفس الهتاف ... متكونش سلبى وتسيبها زى متيجى
صدقونى الشخص الواحد بيعمل فرق كبير لو اتحرك بإيجابية ... ممكن تغير كتير لو موقفتش مكتوف اليد امام ما يحدث
اللى يرمى طوبة بدون هدف اوقفه تماما ... اللى هتلاحظ معاه سكينة، خشبة بدون هدف خد منه الحاجة دى وارميها او شيلها

التصوير
لازم الكاميرات تكتر ومش لازم يبقى كلنا ظاهرين كاميراتنا بشكل مبالغ وانت بتصور ... ولازم تعرف ان فى ناس معاك بتصورك عشان يظهر انتهاك ما للمتظاهرين ... لازم تكون واعى وافعالك محسوبة ... الاعلام العسكرى هيبعت كتير يصوروا لازم نكون جاهزين ليهم ... لذلك ارفض اى حد معاك فى المظاهرة وشه مش ظاهر هاااام للغاية
فى كومبارسات هتنزل معاكوا وفى حد هيبقى مراقبهم عشان يصورهم ... الكومبارس دول ممكن تلاقيهم بيشربوا حشيش فى المظاهرة ... معاهم سكاكين ... بيعاكسوا بنات ... بيتحرشوا بمواطنيين فى الشارع ... خد بالك دول 
مأجورين ضدنا ... ولاحظ مين بيصروهم واوقف ما يحدث فى التو واللحظة
أعلم ايضا ان المخابرات الحربية فيها ناس بتعمل ملفات لينا ... وبيصوروك فى العلن وفى السر

حرب نفسية
اه انت بتلعب حرب نفسية مع المجند اللى هيتعامل معاك بقسوة او قيادته اللى هتأمر المجند انه يتعامل معاك بقسوة ... متديلوش مبرر يسحلك ... قابل السيءة بالحسنة ... يا صديقى فى حد بيصوركوا انتوا الاتنين ومهم قوى يطلعك فى دور المهاجم المتحرش بالأمن ... متديلوش مبرر نفسى يأذيك او يتعامل بعنف معاك ... اوعى تشتمه ... اوعى تبادر بالهجوم ... خلى حد من صحابك يصورك وانت بتتعامل بسلمية ... لان لقدر الله لو استشهدت لازم غيرك ينشر الحقيقة
لازم تتعامل بطريقة تخلى الجندى يتمرد على قيادته لو امره بالضرب او بالتعرض ليك ... كن لطيفا مع الجندي وحسسه اننا بنعمل دا عشانه وعشان يتجوز ويعيش حياة كريمة ... لازم جدا يا جماعة نهتم بالأمور دى

 !أخيراً تذكروا ... لا تعادى كل الناس لانك لن تكسب رضا احدهم، ستكسب فقط سخطهما عليك






أرجع للبلوج دى http://deadlyconscience.blogspot.com/2011_12_22_archive.html عن اندساسى بين المواطنيين الشرفاء والجيش فى أحداث مجلس الوزراء لفهم الامر

05 يناير 2012

الحرب النفسية!



أيوا هى حرب وهنستخدم فيها كل أساليب الدهاء … فى الكلام اللى هقوله دي نصايح مفيدة فى كيفية استخدام اساليب قذرة فى الحرب النفسية ضد كل أعدائنا.

لازم تبقى جندى ذكى فى الحرب النفسية الممنهجة اللى احنا عايزين نمارسها فى كل مكان بنروحه … فى الشغل فى الميكروباص فى المترو فى الاسانسير حتى فى اجتماع العائلة الاسبوعى.

النصايح دى اوعى تستخدمها مع حزب الكنبة اللى ملوش رأى فى اى حاجة … لان النصايح اللى هقولها هيبقى فيها مقدار من الكدب والكدب غلط تستخدمه لغسل دماغ حزب الكنبة … حزب الكنبة عايزين مناقشة من نوع راقى جدا وردود واضحة وطريقة اقناع …. الحرب النفسية ضد اللى مقتنع تماما ان هو اللى صح وانت غلط او بيستعبط وعامل ان هو الحق وانت الباطل.

مبدئياً … اللى بتحاربه نفسيا هسميه الضحية عشان متتلخبطش وانت بتقرى البوست

أوعى تبدأ حربك النفسية بانك تبقى ضد الضحية وتقعد تشوه فيها شخصيا وتقوله انا بحب البلد وانت لاه وتحاول تثبتله انك اقوى منه … لانه خلاص هيفهم انك ضده وتأثيرك عليه هيبقى صفر … ومن الجايز يبقى فى ناس حواليكوا معاه او من حزب الكنبة ينضموا ليه لانك بتهاجم الضحية جامد

اوعى تكون مع الثورة زى م توفيق عكاشة ضد الثورة
هعيدها تانى
اوعى تكون مع الثورة زى م توفيق عكاشة ضد الثورة … اوعى تكون غبى وتكدب اى حاجة الضحية هتقولهالك … اوعى تكون ضده وخلاص … انت فى الأخر بتلعب مع الضحية حرب نفسية مش المطلوب ان فكرتك هى اللى تكسب … المطلوب انك تخرج من الدردشة دى مدمره نفسيا فقط

كن زى عمرو اديب فى وساختك ومتكونش زى توفيق عكاشة بهبله وبتكذيبه كل شىء مما ينافى المنطق
مثال : عمرو اديب فلول لكنه بيعمل انه مع الثورة وبيرمى فى وسط كلامه اشياء تكفرك بالثورة وتشوه رموزها … عمرو اديب مثلا فى حلقة قال
- ايه يا جماعة اللى الناس بتقوله على البرادعى دا … ايه المشكلة يعنى لما بيكون بيشرب خمرة … وايه المشكلة انه يبقى مقضى طول عمره فى النمسا نقوم مثلا نعرض صورة ليه زى دى "تظهر صورة على الشاشة للبرادعى وهو بيسلم على موزة اجنبية فى بلاد الفرنجة وباين قوى فيها ان القعدة مش تمام وفيها خمرة وليلة رأس السنة وبتاع"
ثم يستطرد عمرو اديب ويكمل - طب مهى دى حياتهم يا جماعة من زمان … هو انتوا يعنى مش عارفين عادة الأجانب
يصمت عمرو قليلا ثم يكمل
- وايه يعنى لما بنته تلبس مايوه ويعرضوا صورة لبنته زى دى "تظهر صورة على الشاشة لمايوه بكينى ابن و**ة يهبل كل المشاهدين" … ويكمل عمرو بنظرة خبيثة خاطفة … لا طبعا عيب لما نعرض صورة بنت البرادعى ونشهر بيها زى مهو حاصل فى كل مكان على النت … ايه يعنى لما تلبس مايووه … اومال عايزين بنته تنزل الميه منقبة "عمرو بقى هيبدأ يرمى هلب على الإسلاميين ويكره الناس فيهم"
ويقاطعه شردى مبتسما … لا طبعا مينفش بنت البرادعى تلبس مايوه شرعى هى مش على بلاج جمصة "بيرمى جملة للتاكيد على ان البرادعى هيخلى البلد كلها جزر الكاريبى"

أولا انت هتتلون بلون الضحيةيعنى لازم تعرف هل اللى قدامك من دعاة الاستقرار … ولا باين ان اهله ظباط جيش من عدمه … لازم تتاكد ان اللى هتلعب معاه متقدرش تقنعه بالمنطق فلازم تدمره نفسيا فقط
عزيزى وانت جندى فى حربك النفسية كن زى عمرو أديب فى المثال اللى فات "تعطى السم فى العسل" مع بعض الإضافات لتوصيل رسالة عكسية … متكنش عدو اللى بيناقشك والنقيض عنه … خليك مؤيد لكل اللى بيقولوا بس قلل من روحهم المعنوية وشككهم فى اللى بيعملوه.

هنا هحكيلك على مشهد خيالى لواحد ثورى فى وسط مواطنيين شرفاء
لما تسمع اتنين بيتناقشوا من المواطنيين الشرفاء أدخل مثلا قول
- العيال بتوع ٦ ابريل دول عددهم كبير قوى كل شوية يمسكوا منهم ناس وبردو مكملين
هيرد عليك ويقول
- لا يا عم عددهم مش كبير ولا حاجة هما بس بيأجروا ناس تنزل معاهم ويتسجنوا بدالهم
هترد تقول:
- مهو المجلس العسكرى بردو ابن مت***ةايه اللى يخليه سايبهم كل الفترة دىم ينزل يقبض عليهم كلهم من البيوت ونخلص منهم
هيرد يقولك
- هو يا عم مش فاضى والبلد مليانة عملاء والمخربين كتير … انت ناسي ان السلاح اللى اتاخد من الشرطة مرجعش منه حاجة ومع البلطجية فى كل منطقة "وممكن بسرعة يحكيلك عن قصة خيالية لمقطورة اتقلبت فى مدينة نصر بسلاح واتقتل السواق او قصة اغتصاب مثيرة جدا ل ٧ اغتصبوا واحدة قدام اشهر المحلات فى مصر … قال يعنى عشان يوريك اد ايه البلد مفيهاش امن"
قاطع كلامه بسرعة ورد:
- بس اصل العيال دى متحصنة اعلاميا جامد وامريكا فى ظهرهم وعايزين يخربوها ومن كام يوم جابوا وزير على الهواء قدام حد من منسقى حركة كده من الجداد دول والوزير مكنش عارف يرد عليه … انا مش فاهم بيجيبولنا وزراء ضعاف ليه كده … الجنزورى كمان عشان ايديه نضيفة فملوش فى الشغل الوسخ دا وجايب وزراء بيحسسوا على الناس.
قبل الثورة مكنش فى اى ابن مت***ة يقدر يفتح بوقه … اتفرج يا عم دلوقتى الأعلام والعيال بتوع التحرير ومنظمات واحزاب وحركات حاجة وس*ة عليا النعمة خربوا البلد.
هيجى يحكيلك على مليونية العباسية … اشكر فيها جدا وقوله يا ريت والله نعملها كل جمعة عشان نخرس بيها العيال بنت كذا وكذا بتوع التحرير … وفى وسط كلامك قوم راميله جملة.
- بس احنا عايزين نروح ميدان اكبر من التحرير عشان هما بيبان عددهم كبير قوى والعباسية هنا فى الضعيف … دانا شوفت على الفيسبووك خريطة كده قال مقارنة بين العباسية والتحرير وبتقول ان التحرير مساحته اكبر … والناس يا عم بتصدق.

ممكن تبدأ تشوه رموز مؤيدة للمجلس العسكرى بخباثة عمرو اديب اللى حكيتهالكوا!
مثلا زى مرتضى منصورقعد قوله ان مرتضى بردو ليه قصص مش تمام قديمة ومشكوك فى أمره وكان بيتقال عليه بيشتغل مع امن الدولةبس ارجع وقوله ان مرتضى احسن من ناس كتير اهو على الأقل بيحب البلد ومش عايز يخرب زى بتوع التحرير.

لما الضحية تقولك على معلومة انت عارف انها غلط وبيحاول يقولها بصوت عالى عشان اللى حواليه يتبنوا معلومته على انها حقيقة … فكر كده شوية وبعدين شكك فيها بشكل بسيط ولما تشكك فيها ممكن تشكك فى الرواية نفسها بس تبقى لنفس الهدف أوعى تكدبه تماما … مثلا لو قالك انهم مسكوا جميلة اسماعيل امبارح قاعدة مع بتوع ٦ ابريل وكانوا بيدبروا ازاى يحرقوا ماسبيرو … رد عليه وشوه القصة اللى حكاها بس بقصة تانية فيها نفس هدف قصته عشان تشكك الناس فى الحكاية نفسها … وممكن ترميله جملة فى الاخر وتقول … بردو يا أخى مبقاش حد عارف الحقيقة فين … جرنال يقول حاجة وتانى يوم يكدبها ويعتذر حاجة و**ة.
او قوله ازاى ... امبارح كان فى المصرى اليوم ان جميلة مسافرة امريكا بقالها اسبوع … ممكن تقول حجات كتير تشوه قصته وخلاص.

ممكن كمان بعد فترة من الدردشة تحكيله عن تجربة خيالية لواحد صاحبك ابوه لواء جيش متقاعد ابتدى يغير رأيه فى المجلس العسكرى بعد سحله للبنت والناس الكبيرة دى بتضعف قدام المناظر دى … ورد بعدها وأرفع معناوياته شوية وفهمه انك عيل قذر وقوله:
- مهو هما ولاد وس** بردو مكنوش يعملوا في البنت اللى اتسحلت كده فى عز الضهر هما مش عارفين انهم ممكن يتصوروا.
حسسه اد ايه ان اللى بيأيدوا المجلس العسكرى عيال كلها عندها انفصام فى الشخصية وقوله كلام رخيص فى اعراض بنات او فى حفذوا على قتل ناس بدون ذنب عشان تنضف البلد من الاشكال دى وان الحل الوحيد هو انك تقطع عرق وتسيح دم.

المهم تبان قدامه منهزم نفسيا معظم الوقت لذلك بتتجه بذهنك نحو العنف وفى نفس الوقت انت غلبان ولا تملك شىء الأن سوا الدعاء بس انت بطبيعتك من جوا قذر جدا وان كل اللى زيك بنفس الشكل.

الشعور الانهزامى هيوصله بعد ربع ساعة بالكتير وهيبقى سايبك وهو حاسس انه هيموت ويفجر نفسه بحزام ناسف فى التحرير.

خد بالك ليطلع هو من النوع اللى عايز الناس ترتفع معناويتها وبيقنع الناس انهم بيمثلوا ضمير مصر الحى ويكون عايز يوصل رسالة للى قاعدين حواليه ان هو صح وان هما الأقوى … فى الحالة دى أنصحك فقط بالتشكيك فى رواياته لكن خليك معاه على نفس الخط طول الوقت.
------------------------------------------------------

انا عارف ان اللى انا قولته جايز كتير منكوا يعرفوه … بس حاولت احطه جمب بعضه عشان توضح عندك الرؤيا … الموضوع محتاج تجربة اكتر من مرة عشان تعرف تضعف الضحية بهذا الشكل

أخيرا … فى ثوار بتحس انهم معانا وبينزلوا معانا فى الميدان وفى منهم بتشوفهم على الانترنت فقط بيستخدموا نفس الأساليب النفسية اللى حكيتها فوق لأضعافنا معنويا … لاضعفنا أحنا معنويا … فأحب اقولكوا ان فى ناس بيعملوا كل اللى انا حكيته دا معانا احنا كثوار …

دلوقتى هتحس ان عقلك سخن شوية وبدأت تفكر …. هستأذنك تضيع وقتك تانى وتقرأ كل اللى انا حكيته فوق دا من أول وجديد على انه بيتعمل فينا كثوار "مع أختلاف الامثلة" … وفى وسط قرايتك سبحان الله عقلك هيقولك اسامى الاشخاص اللى بتلعب معانا نفس لعبة الضحية دى سواء على تويتر او فى الشارع او فى الأعلام او فى الصحافة :) … معظمهم بيلعبوا معاك لعبة الضحية اللى غرضها يحطمك نفسيا وهو عمره مكان بيأيدك بس تحث انه واحد مننا فأحذروهم!

متنساش لو حسيت ان انت قريت حاجة مفيدة لا تتأخر فى نشرها ... ولو حسيت انى موصلتش المعلومة كويس يا ريت تنبهنى :)